شباب ليبيا

السلام عليكم ..من غير زعل نخشو في الموضوع طول ..
شباب المدينة
القديمة : معروفين بالمشاكل والدعكات ..ومن شروط الدعكات لديهم أنه يكون
لديك بالطة والا بوخوصة .. وياويلك كان درت مشكله مع واحد منهم .. صدقني
وقتها راح ينزل منتخب كامل زي منتخب نيجيريا ومش لازم انكمل شن اصير بعدها
.
المكاوية : ومفردهم مكاوي وجمع المذكر السالم مكاويين .. وعلى رأي
المثل "تيتي تيتي .. زي ماروحتي زي ما جيتي!!". اهتمامات البعض منهم كرة
القدم مع أنه مش عارف وين يلعبو. الدنيا عندهم زناقي ضيقة .. احتساء كأس
من الكالونيا.. وبعضهم لحبه للمنتجات الوطنية قام بإستخدام الخل أو زيت
الفرامل لزوم المزاج.
نصحية مكاوية: لا تترك سيارتك مفتوحه إذا نزلت بحدا دات العماد .. هذه النصيحة من بورقبة !!
شباب
بوسليم : سهل التعرف عليهم بدون الحاجة إلى معامل مخبرية أو تشريح ..
تعرفهم من طريقة لبسهم للطاقية .. من شروط اختيار الطاقية المناسبة أن
يكون إرتفاعها 150سنتيمتر وعرضها 5 سنتيمتر .. لما تمشي بينهم تحس أنك
ماشي بين ناطحات سحاب مش بشر ويلبسو طواقي ..!
مشاء الله عليهم
دائماً تجد فيهم النشاط والحيويه لدرجة أنهم ما يرقدوش الليل وعندهم شي
واحد مشهور ألا وهو الحبوب ومن أشهر أنواع الحبوب لديهم نوع يسمى (الشبح)
حتى أن احد الشعراء تغزل في حبوب الشبح وأنشد قائلاً :
بلادي بلادي بـلادي المـرح ...
وفيها حبوباً تسمى الشبح...
ادور وتدور وتجيب الفرح...
وعندهم
منطقة مشهورة على نطاق دول العالم اسمها "*****" التي تعتبر الموزع الرسمي
للشبح. ويتصف شباب بو سليم بأن البعض منهم عدواني.. فإذا مثلاً صادف أن
عينك جت في عين واحد منهم .. راح يتمدد صدره ويشمر ايدة ويقولك : خيرك!!
شن فيّة تشبح ..تعالي صورني ؟؟
وكل كوم والسواقة عندهم كوم .. تحس
أنهم مقعمزين يلعبو بلي ستيشن (درايفر القيادة فن وذوق وأخلاق) لكن عندهم
القيادة لا فن ولا ذوق ولا أخلاق ولا للمخدرات!!
نصيحة: إذا كنت مدرس في بوسليم فخليك أخلاق وأعطي درجات .. من جيبك........ وإلا والله تنجلد!!

شباب
وسط المدينة: أهلا وسهلاً .. بما أني عايش بينكم بنعطيكم حقكم من القرمة
.. قصدي الحديث عنكم .. منتشر بين البعض منهم الكذب بصورة كبيرة ومخيفة ..
حدثني أحد الزملاء قائلاً: اسكت مش امس حصلت أرقام تلفونات متاع خمس بنات
وراء بعض !! قتله: أيوه يا ريكي مارتن. ويجيد وسط المدينة فن التعامل بلغة
الأصابع ومن أشهر أنواع الاصابع لديهم أصابع الحشيش الغنية بالمعادن
الطبيعية!!
ويشكل الحشيش أحد أهم الجوانب الترفيهية في حياتهم ..
كذلك girlfriends لازم تكون ملخبط بنات أو تعرف بنات وإلا راح تعتبر شاب
متخلف وعقليتك لا تتواكب وتتماشى مع متطلبات العصر والأمم المتحدة ومجلس
الأمن .. والحرس البلدي . ! وبالقوة يبو يقلدو 2Pac
.. whassup brother!!
وفيه
بعض الشباب حاط على صدره 10 كيلو سلاسل .. وبعضهم يلبس تي شيرت عليها
شعارات وأحرف غريبة وهو والله ما يندري شن معناها JBP: Jewish best people

أعوذ
بالله .. شباب مهدد بالانحراف. أما اهتماماتهم: لف سباسي – الكساد .. كل
ماتقمز مع واحد منهم يقولك: كسااااد – تشجيع الاتحاد – سرقة الإيميلات–
الكذب – المصلحة .. يعني كان ما عندكش فلوس ..يفوتوك زي الريح .

نصيحة: لا تذهب هذا المساء من البيت إذا فاز الإتحاد أو الأهلي .. صدقني راح تكره حياتك !! إنهم من كل حدب وصوب .. يتراقصون.
شباب الهضبة: كل الترفيه .. كل الإثارة .. كل الأكشن .. كل الأسلحة لدى شباب الهضبة .. هضبة يا شوتايم .
نصيحة:
اثناء تجولك في ربوع الشرقية خليك مؤدب وعلى وجهك علامات الحزن والآسى..
لانك لو ابتسمت راح يتم تفسير الابتسامة إلى ابتسامة غير مشروعة ..وهذي
كارثة بحد ذاتها!!
شباب قرررقاااارش: والله علاش شايفين روحهم ..
يتكلم معاك وبعدين ايقولك أنا من قررررقااارش... على عيني ورأسي من
قرررقااارش بس أعصابك !!
نصيحة : بطلوا تسنفير ..
شباب الدريبي:
علم وذكاء وتكنولوجيا .. ما شاء الله عليهم متشخصين في كل وقت وفي كل مكان
!! .. تجدهم متشخصين عند الأكل .. عند النوم .. عند الحلاق .. عند الإشارة
تكون الساعة .. لكن للأمانة لا عندهم لا حشيش ولا حبوب .. لأنهم هكي سبحان
الله بالفطرة مرتفعين .. غير أنت قول الأهلي ربحوا .. وتعال شوف شني يصير.
اهتماماتهم .. مشاهدة أفلام الأكشن ... دخول الشات ثم كتابة عبارات غريبه
زي (لؤؤؤؤؤؤل) .. أنا نبي نعرف ماهو موقع الهمزة من الإعراب في الكلمة
السابقة .. سؤال عليه درجتين!!

التسجيل في المنتديات بأسماء معبرة .. (ضفدع مضيع نظارته .. ضب .. دولاب المطبخ .. إلخ)

تطفيش البنات .. مطاردة الكلاب وتعذيبها ..

نصيحة: مفيش نصيحة يا شباب لأنها مشفرة مع باقة الأوائل ..!!
شباب
الظهرة: ونعم الشباب .. ولكن يلاحظ عليهم كثرة الحسد ونقل الكلام !! ..
"مصطفي طلعتله سيارة جديدة ومكيفة ودراولك .. سمعتوا نوعها كيااا ..!!
واليوم الثاني المسكين .. مصطفي دار حادث بسيارة في الطريق السريع ...عين
وطارت يا خوي !!"

وإذا عطست ينتشر الخبر في كل مكان .. والله فلان عطس، ويمكن يطلعوا عليك إشاعة أنك مصاب بحمى الوادي المتفقع !!

نصيحة: في كلمة جميلة لازم تستخدموها اذا شفتو أي حاجة أعجبتكم "مشاء الله تبارك الله"!!
الخاتمة:
من
الكلام السابق والأصناف المتعددة التي ذكرتها سيتبادر للقارئ أني أتعمد
الإساءة لشباب بلدي .. ولكن أنا ذكرت بعض العينات والتصرفات التي لا
نستطيع أن ننكر وجودها في مجتمعنا، وقطعاً لم أعمم هذه التصرفات على بقية
الشباب لتأكدي بأن هناك الكثير من الشباب فيهم الاستقامة والصلاح وجميع
الصفات الحسنة.. ولكن أحياناً يتم الحكم على سائر الشباب بتصرف مجموعة
بسيطة ترتكب الأخطاء ومن ثم يتم إصدار الحكم بأن شباب ليبيا فيهم وفيهم ..
ولكن هذه هي طبيعة البشر. وأرجو عدم إساءة الفهم من الشباب اللذين يسكنون
فى المناطق المذكورة.